D

 🥀 පොතක අසිරි 🥀

                                D......

✍️ මංජුල සේනාරත්න...

" D " කියවා අවසන් කල පළමු තත්පරයේ පටන් සිතට දැනෙනා නොයෙකුත් සිතුවිලි දහරාවන්ට මැදිව තබනා සටහනකි...

ඩයනා කුමාරිය කියන්නෙම එදා මෙදා තුර ජනාදරය නොවඩුව ලැබූ චරිතයක් බව අප කාහටත් නොරහසකි. ඇය මොලොවින් මිලිනව ගොස් වසර විසිපහක් ගෙවුණු තැන ලියැවුණු "D" කෘතිය තුළින් ඇය මෙරට තුළ ද තවමත් ජීවමාන බව කියා පායි. මෙරට කුඩා දරුවන්ට පවා තවමත් ඇය ගැන කියලා දෙයි. මට මතකයි මං පුංචි කාලෙ ස්නෝවයිට්, රපුන්සෙල් වගේ කුමාරිකාවන්ගේ පින්තූර , ස්ටිකර් එකතු කරනවා. ඒ කාලෙ අම්මා දවසක් ලංකාවෙන් ඈත රටක හිටපු ඩයනා කුමරියක් ගැන කතා කියලා දුන්නා මතකයි මට. ඉතින් , ඒ මතකයත් එක්ක " D" රසවිදි මා තුළින් කියවා ගත නොහැකි හැගීම් සිතුවිලි රැසක් හට ගනුයේ පිට කවරයේ සිටින ඇගේ රුවින් සැරේ සැරේ මා සිතින් විවිධාකාර වූ පැනයන්ද විමසමිනි. සැබැවින්ම සත්‍යයත් කල්පිතයත් අතර උමතුවක් මෙය. කාලයේ වැලිතලාවෙන් වැසීගියා වූ අභිරහස් මායාවක් ඇය.

වර්ෂ 1961 ජුලි 01 වනදා ඩයනා ෆ්‍රැන්සිස් ස්පෙන්සර් ලෙස උපත ලද ඈ 1981 දී එනම් වයස 20 දී බ්‍රිතාන්‍ය දෙවන එළිසබෙත් රැජිනගේ වැඩිමල් පුත් චාල්ස් කුමරු හා විවාහ වීමත් සමග ලොව පුරා ප්‍රසිද්ධියට පත් වන ලදි. විවාහයෙන් චාල්ස් කුමරුට දාව ඩයනා කුමරිය විසින් විලියම් හා හැරී යන කුමරුවන් දෙදෙනාට උපත දෙන ලදි. එහෙත් මෙම විවාහයේ පැවැති නොගැලපීම් මෙන්ම මතභේද හේතු කොටගෙන 1992 දී වෙන් වී 1996 දී දික්කසාදයෙන් නිළ වශයෙන් වෙන් වන ලදි. රාජකීය දික්කසාදයෙන් පසුව 1997 අගෝස්තු 31 දින පැරීසියේ උමං මාර්ගයක් තුළ සිදුවුණු රිය අනතුරකින් වේල්සයේ රෝස කුසුම සදහටම පරවී යන්නේ නොවිසිදුණු අභිරහස් රැසක් ලොව හමුවේ ඉතිරි කරමිනි.

" D " නවකතාවේ ලියැවී ඇත්තේ කුමරියගේ මරණය සිදුවන මොහොත දක්වා සහ මරණය පසුපස ඇති අභිරහස් කතාවයි. 

එසේම, කතුවරයා එකළ ජීවත් වුණු චරිත , අදටත් රහස් රකිමින් ජීවත්වන බොහෝ චරිත මෙන්ම කතාංගයේ ගලා යාම වෙනුවෙන් ගොඩනංවන ලැබූ චරිත ද්ත්වයකින් ද මෙකී අපූරු නිර්මාණය ලාංකීය පාඨක ප්‍රජාව අතරට තිළිණ කොට ඇත. 

කතුවරයා කියා ඇති ලෙසින්ම මෙකී අපූරු නවකතාව කියවීමෙන් පාඨකයා සත්‍ය හා ප්‍රබන්ධය කුමක්දැයි වටහාගත නොහැකි තත්ත්වයට පත් වනු නොවනු මානයි 😁. මා ද ඉන් එක් අයෙකි ❤️.

ඉතින් ඒ සිතුවිල්ල මොනවගේද කියලා දැනගන්න , " D" කියවලාම බලන්න. 

 " ජීවතය අපූරු තැනක් නොවේදැයි දෙසොහොයුරෝ සිතූහ. අප සියල්ලන්ම වෙළී සිටින මායාව වරෙක සුන්දර එකකි. අප වටා අප නොදන්නා අභිරහස අරුමයකි.

කුමරුනි.... එන්න...තත්පර තුනයි...

කළු පැහැති දුරකථනය නාද වෙයි. අසලට යන හැරී එදෙස බලා සිටියි. 

හැරී... කතා කරන්න... විලියම් කීවේය.

දුරකථනය අතට ගෙන සවනට ළංකරන හැරී, විසි එක් වසරක් පුරා මුවින් පිට නොවුණු , කිසි දිනෙක පිටවනු ඇතැයි නොසිතූ වදනක් මිමිණුවේය.

Mummy ? "

මහ රැජින ප්‍රථමයෙන්ම චාල්ස් - කැමිලා විවාහයට අවසර දුන්නා නම් අප්‍රකටව හෝ රෝස කුසුම ජීවමාන වනු ඇත. එසේත් නැතිනම් " D" සැබැවින්ම සත්‍ය වූවා නම් කියලා මෙය රස විදින සෑම පාඨකයෙකුටම පාහේ හැගෙන සිතුවිල්ලක් සේ මම සිතමි. එකී සිතුවිල්ල තව තවත් තරයේ වැළදගන්නට තරම් ප්‍රබල උත්ප්‍රේරකයක් අවසන් පිටෙහි ඇති පින්තූරය මගින්ද ලබා දෙන බව ද සැබෑවකි.

අවසන් ලෙස  මංජුල සේනාරත්නයන් MI6 හි රදවා තබාගෙන ප්‍රශ්න කිරීමකට ලක් නොවේවා යැයිද පතමි 😁. ඔව් ඒක ඒ තරම්ම උමතුවක් 🥺🌻.

 

         🖋 නවෝදනි කුමාරි රණසිංහ.